Hyttene til Lom fjellstyre – orientering om rutinar for reservasjon og utleige til innanbygdsbuande.

Lom fjellstyre har mange hytter og buer i høgfjellet. Dei fleste av desse er opne for utleige i den tida dei ikkje er brukt av beitelag, tamreinlag eller fjelloppsyn.

Fjellstyret ynskjer å legge til rette for auka bruk for innanbygdsbuande. Dette vil vere positivt for å fremje både friluftsliv, og jakt- og fiskeinteressene lokalt.

Innanbygdsbuande hadde tidlegare fyrsteretten til leige av fjellstyrehyttene når dei var ledige, om dei bestilte minst 1 månad før ankomst. Etter revisjon av regelverket for hytteutleige, sak 5/2011, vart det vedteke at: « Innanbygds og utanbygdsbuande får lik rett til å reservere fjellstyrehytter som er lite etterspurt av innanbygdsbuande. Fjellstyrekontoret får fullmakt til å vurdere kva hytter dette gjeld, og om det skal gjelde berre i avgrensa periodar.» Dette vedtaket opna for å kunne legge ut hyttene til fritt sal på Inatur.

For 2020 vil Lom fjellstyre reservere Grønbua, Langvassbua og Veslfjellbu for innanbygdsbuande i periodar og ein del av hyttene vil ikkje være tilgjengelege for utleige via Inatur i vintersesongen. Innanbygdsbuande som ønskjer å leige fjellstyrehytte som ikkje er opna for utleige på Inatur, kan ta kontakt med fjellstyrekontoret, send e-post til lom@fjellstyrene.no